شنطة المدرسة..!

 صباح الخير عليكم 😊 

النهاردة عاوزة اتكلم معاكم عن شنطة المدرسة 

كل اللى عندهم اولاد فى المدارس اكيد بيشتكوا زيى 

😐ان الشنطة تقيلة جداً جداً جداً 

والمدرسين مصرين ان الطلبة ياخدوا معاهم كل حاجة تخص المادة بتاعتهم

ولما يكون الجدول 9 حصص فحدث ولا حرج عن كمية الكتب والاسكتشات

لا والموضة دلوقت كل المدرس يطلبوا اسكتشات 100 ورقة 

😒ماله الكشكول ال40 ورقة

على فكرة كل الاسكتشات دى بيتكتب فيها كام ورقة مايجوش 20 بس

وطبعاً مع التيرم التانى عاوزين اسكتشات جديدة يتكتب فيها اومايتكبتش  

مش مهم المهم طلباتهم تجاب وطبعا اللى بيستفيد من كل ده اصحاب المكتبات 

ياترى حد من المدرسين جرب يشيل الشنطة اتحداه لو قدر

والسؤال هنا هم المدرسين دول ماعندهموش اولاد

 بلاش ماعندهموش اخوات

طب بلاش كل ده ماكانوش طلبة فى يوم من الأيام 

ارحموا من فى الأرض يرحمكم من فى السماء 

تحياتى 

هناء وجدى

30/11/2018