قوم اطمن على حدودك ونفسك الحقيقية ونفسك المزيفة👈ملخص كتاب الخروج عن النص✅ لـ د. محمد طه 👈1

💥ملخص كتاب الخروج عن النص 

الكتاب ده هيساعدك إنك تشوف نفسك بكثبر من التفاصيل والخبايا ، وتشوف اﻵخرين بطريقة جديدة  وتشوف علاقاتك بدرجة عالية من الدقة والوضوح .. يالا بينا نخرج عن النص

⛔قوم اطمن على حدودك 

جسمك هو البيت اللى بتسكن فيه نفسك وروحك ، وزى ما فيه لجسمك حُرمة  فيه برضه لنفسك حُرمة

من حقك ما حدش يقرب من حدودك النفسية أو يقتحمك أو يستحوذ عليك تحت أى مُسمى ، من حقك تختار مين يقرب وتفتح له الباب ومن حقك برضه تحط سور فاصل وسياج منيع

حتى جوه بيتك النفسى فيه ناس بتقعدهم فى الصالة ، وناس تعزمهم على اﻷكل ، وناس تسمح لهم يتحركوا فى البيت وكأنهم أصحاب مكان

فيه ناس هوايتهم اﻹقتحام 👈 يقرب منك يلاقيك فاتح حدودك فيدخل ويبدأ فى استهلاك مشاعرك ، يخليك تحزن مكانه وتشيل همومه بالنيابة عنه ، فتحتار فى مشاكله 👈وانسى بقى نفسك

فيه ناس بتحترف اﻹستحواذ 👈يعنى يحب يمتلك اﻵخر ويحتل أرضه ، يبقى عاوزك موجود ومتاح له طول الوقت ، يبقى عاوز يستحوذ على تفكيرك ومشاعرك ، عاوزك تعيش له مش لنفسك

فيه ناس بتبقى عاملة زى مصاصين الدماء 👈 يبقوا عاوزين ياخدو منك كل اللى يقدروا ياخدوه ، تبقى أنت صاحب العطاء الدائم ، تستحمل وتقطع من نفسك كل يوم حتة وهم مش بيشبعوا أبداً

فيه ناس أخطر من الجميع 👈 بيديبوا الحدود ، تتوه جواهم وما تعرفش اللى أنت حاسه ده تبعك وﻻ تبعهم ، واللى جواك بتاعك وﻻ اترمى فيك من عندهم ، تتلخبط وتحتار وبعدين تضيع

وعلى النقيض فيه ناس واقفين على الحدود مستنيين اﻹذن ، وناس رايحة جاية كل أمالها انك تاخذ بالك ، وناس واقفة بعيد جداً مش عارفة تقرب وﻻ تبعد

قوم بقى اطمن على حدودك .. راجع المسافات اللى بينك وبين الناس واعمل التعديلات اللازمة

بيتك النفسى ملكك حافظ عليه ﻷنه أمانة هيسألك عنها اللى سلمك عقد ملكيته المؤقتة يوم ما خلقك

************************

نفسك الحقيقية ونفسك المزيفة

كل واحد فينا بيتولد وجواه إحتياجات نفسية بسيطة جداً👈احتياج أنك تتشاف ، تتحب ، تتقبل ، تتقدر ، ... وغيرها كتيير 

وظيفة اﻷم واﻷب اﻷساسية هى تلبية اﻹحتياجات دى بشكل مناسب وبقدر كافى ، لكن فى الحقيقة اللى بيحصل غير كده ، الطفل بيكتشف انه علشان تتم تلبية احتياجاته اﻷساسية لازم يكون فيه مقابل 👇👇

اسمع الكلام علشان أحبك ... اشرب اللبن علشان تبقى شاطر ... ما تقولش ﻷ علشان ربنا يحبك

فيتحول الحب إلى حب مشروط والقبول إلى قبول مشروط .. يعمل إيه الطفل الغلبان علشان يتحب ويتقبل .. يعمل حاجة صعبة جداً 😞يضطر يدفع الثمن ، يضطر يبقى زى ما هما عاوزين ، ﻷنه ببساطة شديدة محتاج

يقرر الطفل فى سن معينة يدفن نفسه الحقيقية علشان يحميها من اﻷذى النفسى ويعيش بنفس مزيفة تعرف تتعامل مع اللى حواليه وتفضل نفسه الحقيقية مستنية تطمن وتحس بالدفا علشان تخرج

الطفل اللى مش بيقول ﻷ دفن تلقائيته وحريته وطلع مكانهم كائن مستسلم مالهوش وﻻ لون وﻻ طعم 

 والشاب اللى مش بيعرف غير المذاكرة بيدفن ابداعه وحيويته ويطلع بدالهم شخص مطفى 

 والبنت اللى بتلمع زى الدهب الفالصو اللى بتبالغ فى اظهار مفاتنها غالباً دفنت انوثتها الحقيقية اللى مليانة حنان ودفا وحياء وطلعت مكانها انوثة مزيفة ورغبة عارمة فى الانتقام من كل الرجالة

والراجل اللى ما يعرفش غير الشخط ويمد ايده ولسانه ده غالباً دفن رجولته الحقيقية واستبدلها برجولة مزيفة كلها غرور وافترا واستعراض للقوة

وده كله كوم ونظرة كل حاجة وكل حد فى المجتمع كوم تانى

راجل يعنى صوت عالى ، يعنى مايعيطش

راجل يعنى نظرة قاسية ، عنف وعضلات

وطبعاً ست يعنى صوت واطى ، وباصة فى اﻷرض ، وطاعة عمياء واستسلام وقلة حيلة

خذ نفس عميق وفتح عينك واقرأ اللى جاى كويس

عارف ايه اللى يخلى النفس الحقيقية تطمن وتقر تعود من جديد بدون تشويه

اللى يقدر يعمل كده علاقة انسانية حقيقية👈 يوصلك فيها حب غير مشروط ، علاقة يوصلك فيها أنك مقبول كلك على بعضك ، وتحس فيها أنك موجود ، متقدر ، وأنك تستاهل علاقة ما تكونش مضطر فيها تدفع أى ثمن

العلاقة دى ممكن تكون : صداقة أو زواج

وممكن تكون علاقة علاجية فى اطار علاج نفسى

يا ترى العلاقة دى موجودة؟ ولا مش موجودة؟

دور عليها ولما تلاقيها اتمسك بيها ﻵخر العمر

***************

يتبع حتى نتعرف ليه بنكرر نفس الغلطة

***************

#ملخص_كتاب

#د_محمد_طه

#الخروج_عن_النص