ليه بنكرر نفس الغلطة؟ والمواقف غير المنتهية 👈من ملخص كتاب الخروج عن النص لـ . محمد طه👈2

 💥ملخص كتاب الخروج عن النص الجزء الثانى

ليه بنكرر نفس الغلطة ؟ عن التكرار القهرى

أنا نادم ومش هاعمل كده تانى😔بعد فترة بكرر نفس الغلطة طب ليه !؟ .. هل الغلطات بتتكرر عن قصد ؟ وﻻ بدون وعى منا!!

ﻻحظ كثير من علماء النفس من أول فرويد لغاية دلوقت 👈 أن بعض الناس عندهم رغبة شديدة وغريبة لتكرار بعض التجارب المؤلمة اللى فى حياتهم ويعيدوا نفس الألم وينتهوا إلى نفس النهاية وده اسمه التكرار القهرى وبيكون له عادة سبب من أربعة وهم :

اﻷول .. هو أن الواحد يعيد سيناريو نفس اﻷحداث القديمة بكل تفاصيلها علشان نفسه ينهيها نهاية مختلفة

الثانى .. هو إن الواحد غالباً بيكون فى تجاربه اﻷولى ضعيف ومضطر ، وحس وقتها بالذل واﻹنكسار ، فيكرر ده تانى بس بمزاجه (ولو إحساس مزيف) أنه له السيطرة على اﻷمور

الثالث .. هو أنه كان فى اللى حصل قبل كده (الضحية) فيرجع المرة دى لينتقم ، يكرر نفس التجربة ، بس يكون المرة دى هو (الجانى) وياخد بتاره

الرابع (ومش اﻷخير) .. هو أنه كتير من اللى بيتعرض لتجارب مؤذية بيحس بالذنب أنه ما دافعش عن نفسه ، أو أنه هو اللى ساعد الطرف التانى أنه يؤذيه وده بتحسه كتير من البنات ضحايا التحرش واﻹغتصاب

فيه بعض الناس بتستلذ بتعذيب نفسها وجلد ذاتها  ، ناس بتعمل دماغ من الألم وبتستعذب الوجع ، دول بكل بساطة بينتقموا من نفسهم أو بينتقموا من غيرهم فى نفسهم

أنواع العلاقات البشرية طبيعتها معفدة ﻷقصى حد

من أصعب العلاقات 👈 علاقة البنت اللى بتختار زوج يكون مستغل وأنانى وطماع ومؤذى لها جسدياًونفسياً وعاطفياً ومش بس كده دى بتحارب الدنيا علشانه وما تستحملش فراقه ، وفى حالة الفراق ﻷى سبب تدور على حد له نفس المواصفات وترتبط به

خليك فاكر بقى : كل مرة أنت بترجع فيها للى بيأذيك فأنت اللى أخترت ده وأنت اللى قررته ، وأنت المسئول كل مرة بتحن فيها للى يحسسك أنك متستاهلش فأنت اللى اخترت ده

***************************

المواقف غير المنتهية

إمتى آخر مرة كان فيه جواك مشاعر غضب تجاه حد وما عبرتش عنها؟

فاكر إحساسك اللى قفلت عليه وأنت باصص فى عنيين أبوك وهو بيعنفك؟

طيب فاكر الكلاك اللى كنت عاوز تقوله لوالدتك قبل ما تموت وما جتش ليك فرصة تقوله؟

تفتكر الكلام ده راح ! ، تفتكر المشاعر دى اختفت ! ، تفتكر المواقف دى اتحلت !؟ أحب أقولك ﻷ

الكلام والمشاعر دى مازالت مدفونة فى أعماق وعيك ، كل واحد فينا جواه متحف من اﻵثار القديمة اللى انتهى وقتها بس هى لسه عايشة ومؤثرة فى كل فكرة وشعور وحركة ورد فعل حضرتك بتقوم به ازاى؟

تخيل أنك فى مكان ما فى عز الصيف وهتموت من العطش وواحد جايب لك كوباية ماية ساقعة ، وواحد تانى مستنيك علشان يسألك على حاجة هتختار أيه !؟ ... مهم أنك تنهى احتياجك للعطش (موقف غير منتهى) ، تصور كده لو رحت للى مستنيك هتكون معاه بجزء منك مش مركز وﻻ بكامل طاقتك

شوف بقى أنت جواك كام موقف غير منتهى ، شوف قد أيه من طاقتك مستنزف ، قد أيه من مشاعرك منهك ، وفيه حاجة أكثر خطورة 👈 طول ما أنت جواك موقف غير منتهى فانت بتشوف العالم واﻷحداث واﻷشخاص من خلاله وبتحاول تحله بس مع الناس الغلط اللى مالهموش أى علاقة بالحكاية اﻷصلية

المواقف الغير المنتهية هى اللى ورا كل أنواع وأعراض اﻷمراض النفسية .. طب نعمل أيه بقى !

شوف يا سيدى قدامك حل من خمسة

1- أنك ترجع بالزمن إلى الموقف اﻷصلى وتحله وده طبعاً مستحيل

2- أنك تفضل زى م أنت مسجون فى الماضى بتحاول تحل مع الناس الغلط وده حل يزيد صم وعمى وأذى

3- أنك تروح فعلاً للشخص اللى بينك وبينه موقف غير منتهى وتنهيه نهاية مختلفة ، وهتكتشف ساعتها إن مخاوفك كانت غير حقيقية ، طب لو الطرف التانى غير موجود ، تعمل عملية علاجية بسيطة جداً (السيكودراما) ، تجيب كرسى وتتخيل عليه الشخص ده ، وتبدأ تفرغ كل اللى متخزن جواك .. عاوز تصرخ .. أصرخ .. عاوز تشتم .. اشتم .. عاوز تودعه ، عاوز تعترف بحبك ، كل ده بيتم فى وجود معالج نفسى ، ببساطة كده ما تخليش حاجة باقية جواك ، حل وانهى

4- أنك تسامح وتعفو وطبعاً ده محتاج درجة عالية من النمو النفسى والسلام الداخلى ، ومش كل الناس تقدر على ده ، وبعض الناس تقدر تعمل ده بعد الحل الثالث ، ساعتها بيكون فعلاً (عفو عند المقدرة)

5- أنك تكون من المحسنيين ، يعنى مش بس تسامح وتعفوا .. ﻷ كمان تحسن لمن أساء إليك ودى أعلى درجات النضج النفسى

ها نويت على أيه !؟ تفضل فى عالمك الداخلى المغلق على نفسك؟ وﻻ تبدأ وتحل وتنهى .. هنا ودلوقت

***********************

والى اللقاء مع الجزء الثالث .. مشاعرك اللى هى مش مشاعرك

***********************

#الخروج_عن_النص

#ملخص_كتاب

#السيكودراما

#د_محمد_طه