مشاعرك اللى هى مش مشاعرك وعلاقات خطرة 👈من ملخص كتاب الخروج عن النص ✅ لـ د . محمد طه👈3

 💥ملخص كتاب الخروج عن النص الجزء الثالث

لينك الجزء اﻷول من هنا 👇👇👇

https://hanaawagdy.blogspot.com/2026/01/1.html

لينك الجزء الثانى من هنا 👇👇👇

https://hanaawagdy.blogspot.com/2026/02/2.html

*************

مشاعرك اللى هى مش مشاعرك

كام مرة حسيت أنك مستغرب مشاعرك !؟ كام مرة ظبط نفسك وأنت متألم بدون سبب!؟

كتير جداً من مشاعرنا هى مشاعر اتزرعت فينا ، حد تانى رماها من جواه عليك

مثلاً .. ساعات حديكون مليان خيانة وكدب وخداع ويبدأ يرمى ده عليك ويحسسك دايماً أنك موضع اتهام

أنت عارف كام مرة وقعت فى الفخ ده؟

الحكاية دى اسمها العلمى 👈 التقمص اﻹسقاطى ، وده بيحصل على مستوى اﻷفراد والجماعات ، كمان على مستوى المجتماعات والدول

أخطر ما فى هذا الموضوع أنه ممكن يحول بنى آدم إلى بنى آدم آخر مختلف تماماً

طبعاً اللى بيلعب اللعبة دى بيبقى جواه هدف وعاوز يوصل لنتيجة ولو بغير وعى أو عن غير قصد واضح

يعنى لما حد يطلع مشاعر الغضب من كل اللى بيتعاملوا معاه يبقى عاوز يثبت لنفسه إن كل الناس مش بتستحمله

واللى بيحرك الكره فى كل اللى حواليه بيبقى عاوز يثبت لنفسه أنه مرفوض ومايستاهلش يتحب

طب وبعدين !!!! .. حوه كل واحد فينا فلتر ، مطلوب منك كل يوم انك تستخدمه أول ما تلاقى فيه مشاعر جواك غريبة 👈 على طول استرجع ايه اللى حصل قبلها (قابلت مين/اتصلت بمين/شوفت ايه/...) وابدأ استخدم الفلتر ونقى نفسك من شوائب اﻵخرين ، وارمى لكل حد حاجته ، علشان تعرف تبدأ دورة جديدة من تنقية نفسك كل يوم

***********************

علاقات خطرة

فيه أنواع كتير جداً من العلاقات بين البشر من أخطر العلاقات دى على اﻹطلاق 👈علاقة الحبل السرى وعلاقة العمى

علاقة الحبل السرى .. دى بيكون فيها أحد الطرفين هو مصدر كل حاجة بالنسبة للطرف الثانى ، كتير من اﻷمهات بتوصل ﻷولادها إنها المصدر الوحيد لكل حاجة فما يستغنوش عنها وده بيطمنها بس بيكون على حساب مستقبلهم ، وكتر من اﻷزواج بيخلى نفسه المصدر الوحيد لكل احتياجات زوجته علشان ما يبقاش لها غيره ، ﻻ أصحاب ، ﻻ شغل ، وﻻ حتى أهل

الطرفين فى العلاقة دى بيستفيدوا 👈 طرف بيبقى سلبى وشديد اﻹعتمادية والراحة ، وطرف بيتصور أنه المنقذ والبطل ، العلاقة دى بتكون مؤذية وفاشلة ، ما فيش حاجة اسمها أنت كل حاجة بالنسبة لى ﻷن كل حاجة ده لو اختفى يبقى الدنيا انهارت ويبقى فيه أمراض نفسية وساعتها الكل بيدفع الثمن ، دايماً خلى فيه بدايل ، دايماً خلى فيه ناس ، دايماً خلى فيه ربنا

-----------------

علاقة العمى .. دى بقى من العلاقات المؤذية والمشوهة جداً بين البشر ، فى النوع ده من العلاقات فيه طرف مش بيشوف الطرف التانى أصلاً 👈بمعنى أنه بيكون جواه مشاعر قديمة متخزنة ناحية حد تانى ويتعامل مع شريكه فى العلاقة بنفس المشاعر كأنه شايف وسامع وحاسس الحد التانى بالظبط ، كتير من علاقتنا الحياتية بتكون بهذا الشكل 👈 الحب من أول نظرة ، الكره من أول كلمة ، والغضب الغير مبرر

طيب نعرف إزاى إذا كانت مشاعرنا ناحية حد مشاعر حقيقية فعلاً والا مشاعر قديمة مكبوتة بس تمت إعادة توجيهها !؟ 

أول ما تلاقى مشاعرك كتيرة جداً وسريعة جداً وبدون سبب اعرف أنك غالباً مش شايف

ساعتها .. افتح عينك وشوف من جديد

وافتح ودانك واسمع من اﻷول

وافتح احساسك واستقبل صح

******************

الى اللقاء مع الجزء الرابع .. أنت وعالمك الداخلى

******************

#ملخص_كتاب

#د_محمد_طه

#الخروج_عن_النص

#hanaa_wagdy