أنت وعالك الداخلى والخروج عن النص 👈من ملخص كتاب الخروج عن النص ✅ لـ د . محمد طه 👈 4

 💥ملخص كتاب الخروج عن النص الجزء الرابع 

لينك الجزء اﻷول من هنا 👇👇👇

https://hanaawagdy.blogspot.com/2026/01/1.html

لينك الجزء الثانى من هنا 👇👇👇

https://hanaawagdy.blogspot.com/2026/02/2.html

لينك الجزء الثالث من هنا 👇👇👇

https://hanaawagdy.blogspot.com/2026/02/3.html

*********************

أنت وعالمك الداخلى

كل واحد فينا عايش فى عالمين مختلفين :-

العالم الخارجى .. وده اللى أنت واعى به

والعالم الداخلى .. وده بقى حكايته حكاية ، تصور أن جواك نسخة من كل حد أنت على علاقة به ، نسخة حية معاها كل مشاعرك ناحيته

جواك نسخة حية من والدك / والدك / أخواتك / أصحابك / مدرسيك / زوجتك أو زوجك / أولادك

جواك نسخ من اﻷماكن المهمة بالنسبة لك بكل تفاصيلها حتى رائحة الهواء فيها 

 كل نسخة مرتبطة معاها مشاعر معينة تخص صاحب هذه النسخة وقت تكوينها وادخالها فى عالمك الداخلى النسخ دى المفروض تعملها up date كل شوية علشان ما تظلمش حد فى صورة قديمة أنت واخدها عنه ، حتى نسختك الداخلية عن نفسك محتاجة تتجدد  وتتغير بتغييرك

تصور لو حد قابل فى حياته ناس عاملوه بقسوة أو بحب مشروط أو بإهمال أو ..... ، هيخزن الناس دى فى صورة وحوش ﻷن العالم الداخلى لغته هى الصور ، وهتكون أحلامه عبارة عن مسلسل رعب 

اللى عالمه الداخلى كده هو مريض نفسى من الدرجة اﻷولى 👈 اكتئاب ، اضطراب فى الشخصية ، ولو الوحوش دى اخترقت الحاجز بين العالم الداخلى والعالم الخارجى 👈 يبدأ يشوفها ويسمعها ويحسها فى هلاوس سمعية وبصرية وحسية

العكس .. حد شاف من اللى حواليه كل حب وتفهم وقبول غير مشروط 👈 هيكون عالمه الداخلى جنة مليانة ناس طيبين وفل وياسمين وشمس ودفا

طب لو حد طبيعى زيينا 👈 يعنى شاف ده وشاف ده 👈 ساعتها هيكون عالمه الداخلى مزيج من اﻷول والتانى .. لكن حد منهم هيكون له السيطرة

طبيعة العالم الداخلى لكل واحد فينا بتحدد طريقة استقباله للناس واﻷحداث ، يعنى لو حد عدى من جنبك وماقالش صباح الخير 👈 عالمك الداخلى هو اللى هيحدد هو مطنشك أنه مش واخد باله

بإختصار .. ماحدش فينا عالمه الداخلى سليم بنسبة 100% ، نحل ازاى طيب !؟ 

نصلح اﻷجزاء المعطوبة فى عالمنا الداخلى .. هو مش اللى عمل ده كله علاقة مع ناس وصلنا منهم رسائل نفسية سيئة .. إذاً مش هيصلح ده غير علاقات أخرى يوصلنا منها رسائل نفسية مختلفة طيبة من فبول وحب واحترام ، ممكن علاقة انسانية طيبة تحول جحيمك الداخلى إلى جنة 👈وهى دى فكرة العلاج النفسى 

علاقة حقيقية واحدة مع صديق / استاذ / حبيب / معالج نفسى .. بتقدر تحارب الوحوش اللى جواك وبتصالحك على نفسك ، بتصالحك على غيرك ، فتتغير وتتغير شخصيتك ، تبقى بنى آدم تانى مليان أمل وحب وحياة

ممكن تقوم تدور على العلاقة دى دلوقت

ممكن تكتشفها أو تعيد اكتشافها فى حياتك

ممكن تسمح بيها وتحافظ عليها

الحب يشفى الحب يطيب الخواطر

***************************

الخروج عن النص

هو فيه كام نص فى حياتك وكام خطة مترتبة؟

من أول ما تتولد يبدأ نص اﻷم واﻷب 👈 بتاع اسمع الكلام ، ما تقولش ﻷ ، ذاكر ﻻزم تطلع اﻷول

وبعدين نص المجتمع بتاع ضل راجل وﻻ ضل حيطة

فاكر لما كنت تحاول تخرج عن النص كان بيحصل ايه ،

فاكر اللعب على وتر شعورك بالذنب وأنت صغير ؟

فاكر كمية الكلام اللى مالهوش ﻻزمة اللى كنت مضطر تحفظه علشان تبخه فى اﻹمتحان؟

طيب فاكر كلام الشيخ الجليل أو الكاهن عن أنك مخطئ وعاصى وكافر لمجرد أنك سألته سؤال بره النص؟ أو فكرت بفكرة برة الصندوق؟ وإزاى تعامل معاك وكأنه معاه مفاتيح الجنة والنار

كل دول وغيرهم كانوا عاوزينك تبقى أى حاجة غير نفسك الحقيقية اللى ربنا خلقها ، خلقها حرة جريئة لها حق اﻹختيار وتقرير المصير وتحمل المسئولية ، كانوا عاوزينك تبقى زيهم تقليدى ، ما تخاطرش وتستسلم لكل ما هو زائف وهش وفارغ ، والتمن كان تشويهك ، فتخرج منك نفس مزيفة متكيفة مع النص المكتوب

تعرف أنك عندك القدرة على تغيير اﻷحداث .. يقول الرسول صل الله عليه وسلم (ﻻ يرد القضاء إلا الدعاء)

يبقى ربنا إدالك فى ايدك مفتاح تغير بيه أحداث حياتك بإذنه

مافيش أى حد من حقه يرسم لك طريق حياتك  ، وﻻ أى حد يملى عليك أرائه وتجاربه الخاصة وكأنها نصوص مقدسة ، أو تحقق حلم حياته اللى ماحققهوش

أنت كائن مستقل بذاتك ، حر ومسئول

مخاطرة اﻷمل .. اﻷمل دايماً محتاج حاجتين :-

1- أنك تصدق إحساسك

2- تكون مستعد للمخاطرة ، أنك تسيب اللى تعرفه وتروح للى ماتعرفهوش ، أنك تقبل الفشل والضعف

ترياق الحب .. كل واحد فينا عنده احتياجات نفسية بيتولد بيها وطول الوقت بيسعى أنه يشبعها من خلال علاقته بالآخرين 👈 احتياج أنك تتشاف وتتسمع ، احتياج أنك تتقبل من غير شروط ، احتياج احساس أن وجودك مهم ومبهج وله معنى عند اللى حواليك ، احتياج انك تبقى تلقائى بدون زيف ، احتياج أنك تقول (ﻷ) بمنتهى القوة عند اللزوم .. اﻹحتياجات دى لو تم اشباعها أثناء التربية 👈 بيطلع انسان سوى وصحيح نفسياً وتكبر معاه احتياجاته فى صورة معقولة ، لكن لو لم يتم اشباعها منذ الصغر بتفضل فى صورتها الطفولية وتكبر مع الواحد بشكل مرضى

إذا كان فى أى حاجة ممكن تشبع كل اﻹحتياجات النفسية اﻷساسية ﻷى بنى آدم فهى حب صادق

إذا كان فيه دواء شافى لكل اﻷمراض النفسية من القلق وحتى الجنون فهو حب خالص من القلب

إذا كان فيه سكة واحدة تصل بينك وبين نفسك ، وبين الناس وبين ربنا فهى سكة الحب

الحب هو اﻹجابة اﻷخيرة على كل التساؤلات

الحب هو الجراحة الناجحة لكل القلوب

الحب هو كلمة السر وروعة اﻹحساس ومنبع النور

*******************************

وإلى اللقاء مع الجزء الخامس والحاجة إلى الشوفان

*******************************

#الخروج_عن_النص

#ملخص_كتاب

#د_محمد_طه

#hanaa_wagdy