الحاجة إلى الشوفان وأوعى تكون مدمن 👈من ملخص كتاب الخروج عن النص ✅ لـ د . محمد طه 👈 5

 💥ملخص كتاب الخروج عن النص الجزء الخامس

لينك الجزء اﻷول من هنا 👇👇👇

https://hanaawagdy.blogspot.com/2026/01/1.html

لينك الجزء الثانى من هنا 👇👇👇

https://hanaawagdy.blogspot.com/2026/02/2.html

لينك الجزء الثالث من هنا 👇👇👇

https://hanaawagdy.blogspot.com/2026/02/3.html

لينك الجزء الرابع من هنا 👇👇👇

https://hanaawagdy.blogspot.com/2026/02/4.html

**************************

الحاجة إلى الشوفان

فيه احتياج عام عند البشر جميعاً اسمه الحاجة إلى الشوفان ، كلنا مولودين بهذا اﻹحتياج وبنبدأ نسعى وراه

مهم جداً أننا نرضى ونشبع اﻹحتياج البسيط ده عند أوﻻدنا ﻷنهم لو كبرو وهما جعانيين للشوفان ممكن يعملوا أى حاجة ويدفعوا أى تمن علشان يتشافوا

من أول الشخص النرجسى مروراً بالشخصية الهيسترويونية المهوسة باللبس الملون والمكياج المبالغ فيه وانتهاء بالشخص متوهم المرض فقط علشان يتشاف يحس أنه موجود وفى بؤرة اﻹهتمام

فى أحد تمارين اﻹحماء بتاع السيكو دراما 👈 تمرين اسمه اﻷسامى وفكرته إن كل واحد يقول اسمه وباقى المجموعة تردد اسمه وراه بصوت عالى ومش ممكن تتخيلوا وصف كل واحد لما يسمع اسمه وهو بيتنادى عليه بصوت عالى 👈 حد يحس أنه مبسوط ، حد يحس أنه مطمن ، حد يحس أن الدنيا نورت .. كلها تعبيرات مختلفة عن أصل واحد احساس أنى متشاف

نرجع بقى ونقول : - حسس الطرف اﻵخر (اﻷولاد / اﻷصدقاء / اﻷزواج / .. وغيرهم) فى علاقتك بيه أنه متشاف ، أنه موجود ووجوده له قيمة وتأثير ، وأن وجوده مفرح ومبهج وجميلومهم ، علشان البديل ممكن يكون تمنه غالى قوى

وكمان لما تحس أنك محتاج أنك تتشاف 👈 اطلبه بدون تردد ، اطلبه بصراحة وبوضوح وبكلام مباشر ، علشان برضه البديلممكن يكون تمنه غالى قوى

**********************

أوعى تكون مدمن

عنوان يخض مش كده ، طبعاً أول صورة جت فى ذهنك هى صورة واحد مدمن مخدرات ، أحب أقولك اﻹدمان مش بس مخدرات هو بس أشهرها لكنه مش أكثرها خطورة وﻻ أكثرها انتشاراً!!

فيه إدمان للجنس بمعدل خارج اﻹطار الطبيعى ، فيه إدمان للعمل يعنى تشتغل وتنسى نفسك واللى حواليك ، فيه إدمان للعلاقات المؤذية جسدياً أو نفسياً ، فيه إدمان للعب دور معين (ضحية/منقذ/جانى) ، فيه إدمان (للفلوس /السفر/القراءة/الوحدة/الفيسبوك/...) ، وفيه إدمان للتدين السطحى ، وطبعاً فيه إدمان للحب (المزيف برضه) ، فيه إدمان لكل حاجة

عارف المدمن بيدور على إيه؟ على حاجة فقدها من زمان ، المدمن عنده احتياج نفسى أساسى وعميق ، المدمن محتاج علاقة ، علاقة مع حد بس مش أى حد ، محتاج علاقة مع حد مايقولهش (ﻷ) على الفاضية والمليانة ، مع حد يلاقيه وقت ما يحتاجه ، المدمن محتاج علاقة مع حد يخفف عنه إحساسه العميق بالألم ويطبطب عليه ويطيب جراحه

المدمن اتحرم من ده بس لقاه كله فى مادة إدمانه ، المدمن بقى مدمن ﻷنه محتاج

المدمن هيفضل يدمن طول ما العلاقات الحقيقية مش موجودة فى حياته ، لكن لو العلاقة دى اتوجدت مع أى حد حواليه هيبطل إدمان فوراً

اللى ماعندهوش العلاقة دى يقوم يدور عليها لغاية ما يلاقيها ويتمسك بيها ويحافظ عليها ﻷن البديل تمنه غالى قوى

شوفتوا الوجع ؟

شوفتوا فيه كام مدمن حوالينا فى الشوارع والبيوت والعمل !

فيه حد شاف هو شخصياً بيدمن إيه؟

فيه حد شاف هو نفسه محتاج إيه؟

فيه حد هيقوم يدور على البديل الحقيقى من خلال علاقة إنسانية حقيقية !

ياريت نبدأ دلوقت

**************************

وإلى اللقاء مع الجزء السادس ودورك فى سيناريو حياتك

**************************

#ملخص_كتاب

#د_محمد_طه

#الخروج_عن_النص

#الإدمان