دورك فى سيناريو حياتك 👈من ملخص كتاب الخروج عن النص ✅ لـ د . محمد طه 👈6

 💥ملخص كتاب الخروج عن النص الجزء السادس

لينك الجزء اﻷول من هنا 👇👇👇

https://hanaawagdy.blogspot.com/2026/01/1.html

لينك الجزء الثانى من هنا 👇👇👇

https://hanaawagdy.blogspot.com/2026/02/2.html

لينك الجزء الثالث من هنا 👇👇👇

https://hanaawagdy.blogspot.com/2026/02/3.html

لينك الجزء الرابع من هنا 👇👇👇

https://hanaawagdy.blogspot.com/2026/02/4.html

لينك الجزء الخامس من هنا 👇👇👇

https://hanaawagdy.blogspot.com/2026/02/5.html

*********************

دورك فى سيناريو حياتك

ستووب كل حاجة بتعملها .. عاوز كل تركيزك معايا ، اختار يالا أهم علاقة فى حياتك ، اخترت !! ، كويس جداً ، جاوب بقى على السؤال التالى :- فى العلاقة دى انت بتلعب دور مين ؟ دور الضحية وﻻ دور الجانى؟ ولا دور المنقذ؟ 

بتلعب دور الشخص اللى بيدوب كل ليلة وكل يوم علشان غيره يتهنى ويرتاح 👈 (دور الضحية)

وﻻ بتلعب دور الشخص اللى بيدى أوامر وبيستنى من اﻵخرين العطاء والسماح بدون حدود ، الشخص اللى مش بيرضى بسهولة 👈 (دور الجانى) ، واللى غالباً مش هتشوف نفسك فيه على اﻷقل دلوقت ، لكن ما تستعجلش

واللا بتلعب دور الشخص اللطيف الطيب الحنين اللى بيساعد اﻵخرين بكل سخاء 👈 (دور المنقذ)

عرفت تحدد دورك فى العلاقة اللى اخترتها!؟ طب عرفت تحدد أدوارك فى باقى علاقات حياتك؟

طب خد عندك .. اﻷب القاسى العنيف اللى كلمته مش بتنزل اﻷرض  واللى بيدى لنفسه الحق فى تقرير مصير أوﻻده بناء على رؤيته ، ده بيلعب دور الجانى ، وأوﻻده اللى مضطرين يسمعوا كلامه ولو على حساب نفسهم ومستقبلهم ، دول بيلعبوا دور الضحية

واﻷم اللى بتحاول طول الوقت تهدى اﻷمور وتحمى اﻷوﻻد من أذى اﻷب 👈 دى بتلعب دور المنقذ

والزوج اللى بيهين زوجته باليل وبيجرحها بالنهار ويقلل من شأنها مع كل كلمة وكل نظرة وتصرف 👈 ده بيلعب دور الجانى

والزوجه اللى بتستحمل ده وبتطنش علشان تعيش وتيجى على نفسها علشان اﻷوﻻد 👈 دى بتلعب دور الضحية

وزميلها اللى فى الشغل اللى بيهتم بيها ويديها الإهتمام والحنان 👈ده بيلعب دور المنقذ

كل واحد فينا جواه سيناريو راسمه لحياته بناء على اللى وصله أثناء التربية وبيكون له دور محدد

وكل واحد بيدور فى رحلة حياته على أشخاص تنطبق عليهم مواصفات باقى اﻷدوار .. يعنى الضحية بيدور على الجانى ولو ما لاقهوش يشوف حد عنده استعداد ويبدأ بكل بساطة وبراعة يطلع الدور ده منه لغاية ما يتقنه ويصدقه ويتحول له 

مثلاً .. الطفل اللى كان بيتعامل معاملة كلها قسوة وإهمال 👈 الطفل ده لما يكبر ويتجوز ويخلف بيكون قدامه سيناريو من تلاته

1- يكرر نفس اللى اتعمل معاه وهو صغير مع زوجته وأولاده ويلعب دور الجانى

2- يكرر نفس الدور اللى اتربى عليه وهو الضحية فيختار زوجة متسلطة مفترية

3- يعيش طول الوقت فى دور المنقذ ﻷوﻻده من قسوة أمهم ويلعب دور المنقذ

فيه حاجة كمان .. أنت ممكن تكون فى علاقة ما بتلعب دور الجانى وفى علاقة تانية بتلعب دور الضحية

ده ممكن فى العلاقة الواحدة تتبادل اﻷدوار .. يعنى اللى بتموت فى حبيبها وبتوصل له أنه الملاذ اﻷول واﻷخير ليها فى حياتها ، فى الحقيقة هى بتعيش دور الضحية وبتطلع منه دور المنقذ ، وهو يلعبه ببراعة علشان يوصل لنفسه أنه طيب وجدع ، ويدى لنفسه الحق أنه يمتلكها ويتحول إلى جانى وعلشان كده بعد فترة من الزواج هتشتكى منه مُر الشكوى أنه مسيطر وبيخنقها 

مش بس كده .. اﻷصعب من كل ده بقى .. إنك غالباً بتلعب دور وبتكون متصور أنك بتلعب دور تانى تماماً

على فكرة .. أوعى تفتكر إن فيه دور فيهم أحسن من التانى👈 بالعكس 👉كل دور جواه أذى وضرر

اللى بيلعب دور الضحية بيلعبه علشان يثبت لنفسه أنه دايماً مظلوم وعديم الحيلة فيهرب من المسئولية واﻹحساس بالذنب ويصدره لغيره

واللى بيلعب دور المنقذ بينصب شباكه حواليك علشان يستبيح أرضك ويمتلكك

واللى بيلعب دور الجانى ده حد بينتقم من نفسه ومن الحياة ومن ناس آخرين فى شخصك

إيه اﻷخبار دلوقت؟

عرفت أنت بتلعب دور مين فى علاقات حياتك؟

طب نعمل ايه بقى؟

أولاً .. أوعى تندم ، بالعكس احمد ربنا أنك شوفت وعرفت

ثانياً .. وقف فوراً ممارسة هذا الدور المؤذى ليك ولغيرك ، اعمل ستوووب كبيرة جداً ، عيد ترتيب حياتك وتقييم علاقاتك وكفاية أذى لغاية كده

ثالثاً .. ما تسمحش ﻷى حد أنه يمارس معاك دور من اﻷدوار دى أو أنه يطلعه منك فى أى علاقة حتى لو مدتها 5 دقائق صدفة

خليك حقيقى .. اتحمل مسئولية نفسك بجد  .. ومسئولية علاقاتك بجد

ما تبقاش جانى وﻻ ضحية وﻻ منقذ

************************

إلى اللقاء مع الجزء السابع نصف حياة

************************

#الخروج_عن_النص

#ملخص_كتاب

#دورك_فى_سيناريو_حياتك

#د_محمد_طه