كلنا ماليفيسينت Malificent 👈من ملخص كتاب الخروج عن النص ✅ لـ د . محمد طه 👈 9

💥 ملخص كتاب الخروج عن النص الجزء التاسع

كلنا ماليفيسينت Malificent

ماليفيسينت جنية رقيقة جميلة ليها جناحين بتطير بيهم فى براح الدنيا وبتحمى بيهم نفسها وأهلها ، ماليفيسينت بريئة وطيبة وتلقائية ، وقعت فى حب صبى بس ﻷنه من البشر فالطمع والجشع أغواه بأنه يقص جناحتها ويهديهم للملك علشان يتجوز بنته ويورث عرشه

ماليفيسينت بعد ما اتكسرت و اتشوهت ملاها الغضب والكره والرغبة الشديدة فى اﻹنتقام من كل جنس البشر المُمثل اﻵن فى الملك الجديد وزوجته وبنته المولودة الجديدة (أرورا)

ماليفيسينت أصابت المولودة بلعنة يتم تفعيلها عند بلوغها 16 سنة (نفس سنها لما صدقت بوجود حب حقيقى) اللعنة دى هتخليها فى غيبوبة ما تصحاش منها اﻻ مع قبلة من حد بيحبها حب حقيقى ، كل يوم بيمر بيزيد كرهها للبنت أكثر ، لكن براءة (أرورا) وجمالها وبساطتها تبدأ تحرك فى ماليفيسينت مشاعر جديدة تعاطف .. قبول .. اهتمام يتطور بعد شوية إلى حب ، فتقرر ابطال مفعول اللعنة قبل موعدها بيوم واحد ولكنها تفشل وتدخل (أرورا) فى غيبوبة تامة

قبل الغيبوبة بأيام اتعرفت البنت على فتى وكان ابتدى يحبها .. قادته ماليفيسينت ليها فى محاولة ﻹنقاذها بقبلة حب حقيقية ، لكن المفاجأة إنها ما صحيتش من الغيبوبة .. لتؤكد لها وللمشاهدين نفس الرسالة مافيش حاجة اسمها حب حقيقى😒

ماليفيسينت تتألم وتبكى وتعد (أرورا) بأن ترعاها وتودعها بقبلة .. تصحى (أرورا) من الغيبوبة .. علشان نكتشف إن دى كانت قبلة الحب الحقيقى اللى أنقذتها وأعادتها للحياة ، هى مش بس أعادة (أرورا) للحياة لا دى كمان ساعدت (أرورا) إنها ترجع ل ماليفييسنت جناحتها المسروقة وحياتها المفقودة علشان تسامح نفسها وتبدأ من جديد .

القصة دى هى قصة أى مريض نفسى .. طفل صغير برئ يقوم اﻵباء واﻷمهات بقصقصة جناحات أطفالهم علشان يمشى فى الطريق اللى راسمينه له ويحقق حلمهم الشخصى ، والنتيجة 👈 مشروع مريض نفسى ملئ بالكره لنفسه وللعالم

عارف المريض النفسى بيخف ازاى؟ الشوفان ، الألم ، القبول .. تبدأ لحظة التغيير الحقيقية بإنك تشوف الجانب اﻵخر من نفسك ، الجانب المظلم اللى ما كنتش بتسمح لنفسك أنك ىتشوفه ، وحتى لو شوفته كنت بتلتمس لنفسك اﻷعذار والحيل النفسية الدفاعية ، هتكتشف وقتها أنك زى ما اتظلمت زمان بتظلم نفسك وغيرك دلوقت ، وزى ما كنت مش مسئول عن اللى حصل زمان فأنت مسئول اﻵن عن استمراره وتكراره بشكل أو بآخر

الشوفان ده مؤلم ﻷنه مليان تناقضات ، تحمله عاوز مجهود نفسى شاق ، ناس كتير بتقف عند المرحلة دى وما تقدرش تكمل ، تشوف وتتألم وبس

علشان تقدر تكمل قدامك خطوة مهمة جدا 👈القبول👉 تقبل نفسك كده كلها على بعضها ، الوحش قبل الحلو ، تقبل الضعف والخطأ والفشل ، تقبل أنك بنى آدم ، القبول هنا مش معناه الموافقة وﻻ معناه اﻹستسلام بالعكس ، القبول هنا هو الدرجة اﻷولى فى سلم التغيير

شوفت ! أتألمت ! قبلت ! .. تبدأ دلوقت عملية الإلتحام والإلتئام التلقائية بين أجزاء نفسك المتنافرة ، وكسور خاطرك المبعثرة ، بعدها يتم التئام الجرح بصورة تلقائية ذاتية زى ما حصل لــ ماليفيسينت

ماليفيسينت اتظلمت واتشوهت وعاشت الكره واﻹنتقام ، وشافت التناقض فى نفسها وفى العالم ، واتألمت ألم شديد لهذا الشوفان ، وقبلت التناقض اللى شافته وشافت مسئوليتها وقررت تتغير .. اتحول كل ده جواها إلى حب حقيقى له القدرة للشفاء

ماليفيسينت هى كل حد جواه جانب مظلم وجانب مبهر محتاجين يتلملموا ويلتئموا علشان تبدأ الحياة الحقيقية

ما تيأسش من نفسك مهما عملت ومهما ضعفت ومهما فشلت

ماليفيسينت هى أنت وأنا وكل البشر

شوف .. أتألم .. أقبل ، سامح نفسك واﻻخرين وابدأ من جديد

الحب الحقيقى هو أنت والشفاء الحقيقى لن يأتى إﻻ من داخلك

**********************************

وإلى اللقاء مع الجزء العاشر واﻷخير .. أنا موجود 👈 إذاً أنا أستحق

*********************************

لينك الجزء اﻷول من هنا 👈https://hanaawagdy.blogspot.com/2026/01/1.html

لينك الجزء الثانى من هنا 👈https://hanaawagdy.blogspot.com/2026/02/2.html

لينك الجزء الثالث من هنا 👈https://hanaawagdy.blogspot.com/2026/02/3.html

لينك الجزء الرابع من هنا 👈https://hanaawagdy.blogspot.com/2026/02/4.html

لينك الجزء الخامس من هنا 👈https://hanaawagdy.blogspot.com/2026/02/5.html

لينك الجزء السادس من هنا 👈https://hanaawagdy.blogspot.com/2026/02/6.html

لينك الجزء السابع من هنا 👈https://hanaawagdy.blogspot.com/2026/02/7.html

لينك الجزء الثامن من هنا 👈 https://hanaawagdy.blogspot.com/2026/03/8.html